政壇：羅台秦帶隊歎江門美食
美國返港、曾出任科大微電子製造中心主任嘅物理學者羅台秦，嫁咗港人老公戴澤良之後，同老公創業，○二年收購由「光學儀器大王」黃克競所創辦嘅寶源基業，集團主要生產相機同望遠鏡等光學儀器。羅台秦早前以母親羅任增婉名義捐錢興建江門市第一中學嘅體育館，並喺體育館落成儀式時拉隊返去江門五邑。
同行嘅有廠商會副會長李秀恆夫婦、徐炳光夫婦同浸會大學校長陳新滋等好友。校方安排多達二千五百名高中生參加剪綵儀式，然後聆聽陳新滋演講。見慣大場面嘅陳校長驚嘆話，從未試過對住咁多人演講，演講完之後，大批學生包圍佢攞簽名。
主人家羅台秦就好周到，眾人全程盡享地道陳皮美食，包括陳皮鴨、陳皮酥餅，連應節嘅月餅都加入陳皮。佢哋沿途仲買咗唔少農家擺賣嘅鵝蛋同木瓜添！
羅台秦（左）及廠商會會董吳國安（右）捧住嘅鵝蛋，有成個橙咁大。