政壇：徐立之盼光榮謝幕

香港大學舊年舉行百周年校慶活動，卻因處理副總理李克強訪問安排引發軒然大波，校長徐立之冇耐後更忽然宣布約滿唔再續。事隔一年，由於港大未搵到新校長，徐立之要繼續頂住先，佢日前出席一個活動，講到校長任期都有啲感慨，仲坦言希望可以喺最光輝嘅一刻離開，留住美好時刻喎。徐校長呢個喺光榮下謝幕嘅渴望，何嘗唔係港大8.18事件成為佢學術生涯一大心結嘅反射？

徐校長話，佢嘅任期最遲去到二○一四年二月底，假如一三年九月港大物色到合適嘅校長人選，佢就會趁最光輝嘅一刻離開。呢句話嘅意思似乎係佢希望喺大學落實四年制後一年離開，而九月係新學期開始，所以佢希望九月前離任，總比二月份學期中段為佳。

新陳代謝喻去留

佢笑言，自己做校長咁耐，「計仔」都快用盡，仲唔早走早着咩！不過徐校長離任消息傳出後，好多學生都話唔捨得。佢就話港大咁大間機構，佢總會有走嘅一日，呢個係新陳代謝嘅自然定律。呢套理論完全貫徹咗佢從事嘅分子遺傳研究嘅思維模式。

○二年起擔任港大校長嘅徐立之，在任十年間一向受到師生愛戴，曾經獲得「香港最佳大學校長」美譽，之前長時間喺加拿大做分子遺傳研究嘅佢話，嚟港大做校長前，根本冇諗過嚟香港打工兼留咗咁耐，不過事實證明呢個意外改變咗好多人同事。

咁校長離任之後會否繼續留港呢？徐校長就話暫未有計劃，但佢心中有個數，如果離任後六個月內都冇人邀請佢做嘢，就會疊埋心水歎世界。