賊的士黨通街走 旅遊之都淪賊竇

剪徑者，攔路搶劫也。《水滸傳》假扮李逵嘅李鬼，就係專門靠呢家嘢食大茶飯。估唔到廿一世紀嘅香港，居然出咗班現代剪徑客，不過搵食手法就先進好多，唔使舞刀弄棍打劫，而係揸的士明搶。

話說尋日有三位內地旅客由旺角搭的士去尖沙咀中港碼頭，到達目的地後畀錢落車，正準備打開車尾箱攞行李，司機突然踩油絕塵而去，乘客惟有報警求助。據報事主共損失兩萬蚊現金、金鏈、鑽戒等財物，總值六萬蚊，呢趟香港遊嘅代價認真大囉。

光天化日下賊的士黨又呃又搶，仲有王法嘅，旅客損失慘重唔在講，仲要嚇餐飽，「旅遊之都」原來係生人勿近嘅賊竇，香港今鋪真係乜架都丟清光。

話時話，一不離二，二不離三，同樣手法嘅的士劫案已經唔係乜嘢新聞，日前啱啱發生過一單，咁快就食過翻尋味，問你驚未！

呢嗱，日前有對加拿大籍華裔夫婦由機場搭的士去灣仔，途中司機不斷暗中撳咪錶掣，加完行李費又加隧道費。原來濫收車資不過係前奏，兩人一離開車廂，司機即刻開車帶埋乘客行李逃去。好彩受害人夠醒目，記低車牌報警，警方兩日後將賊的司機緝拿歸案。唔講唔知，今年已經發生過至少十四宗同類罪案。

的士被視為一個城市嘅「名片」，亦可以講係「形象大使」，旅客初到貴境，未見好客之道，先遇攔路打劫，影響旅遊業事小，損害香港形象事大，你話香港人仲點樣見人吖？

係人都知，的士罪案接二連三發生，搵食手法大同小異，絕對唔係獨行賊所為，當局千祈唔可以掉以輕心。講真，如果當局打擊力度夠嘅，無良司機又點會咁沙膽吖。嗱，警方上個月展開放蛇行動，原本收費八十蚊嘅車程，一名的士司機收咗五百蚊之後，唔找錢就開車逃去無蹤，最終被截停拘捕。濫收車資，連屈帶搶，點知結果只係判社會服務令、停牌六個月及罰款兩百蚊，咁嘅處罰有乜阻嚇力吖？唔怪得賊的黨愈來愈肆無忌憚喇。

開講有話，治亂世須用重典。如果當局唔加強執法，重重懲罰，賊的士黨只會愈來愈多嘅咋。計太一叮話齋，家陣劏客掠水嘅謀人寺無王管，當街打劫嘅賊的士通街走，再係咁落去，香港形象遲早徹底破產，想吸引旅客都好難咯，叮！