政壇：銅鑼灣豹哥獲港大頒院士
香港大學尋日舉行名譽大學院士頒授典禮，由於撞船事件中有兩位死難者係港大研究院學生，尋日又係全港哀悼日，校長徐立之喺典禮上特意安排默哀一分鐘，以悼念兩位校友。而獲頒授院士嘅有樂施會前總幹事莊陳有、歷史博物館榮譽顧問丁新豹（豹哥）、SML集團主席孫少文（Simon）、著名作家陳冠中等。
丁新豹尋日畀「豹哥樂園」粉絲包圍，大家都醉心研究歷史。致力研究銅鑼灣歷史嘅豹哥話，佢喺百德新街居住超過五十年，最難忘以前嘅避風塘，不時坐住艇仔，食住避風塘炒蟹望日落。粉絲群中仲有港大專業進修學院董事局主席張永霖，佢哋兩個原來早在六十年代因病入咗養和醫院，仲瞓埋喺同一間病房，呢個緣分係咪太奇妙？
丁新豹（右五）喜獲殊榮，家姐（右四）、妹妹（右一）等親友到場支持。