政壇：搞搞政：吳亮星林健鋒夾擊富貴黨

立法會嘅新形勢係泛民同建制各自內鬥，早前我哋講過代表商界嘅建制派好多心病，上屆雖然有經濟動力同自由黨等十二人組成嘅工商專業聯盟（工專聯），但有指富貴黨同經濟動力好似「貼錯門神」咁，呢個組織亦未見有動作。今次工專聯擬重新整合再出發，經濟動力林健鋒等三子早前更率先出招，據聞佢哋仲同金融界吳亮星等多名無黨派嘅新早餐派有傾有講，兼且有好大合作空間，而自由黨則疑似被孤立。

消息指，新早餐派以吳亮星同體育、演藝、文化及出版界馬逢國為首，加上幾名建制派獨立議員，基於部分人講明唔會加入任何組織，所以未必會有正式嘅稱號，會按需要參與類似工專聯呢個平台同經濟動力等人合作，總之有需要就合作，冇需要就各自修行。

經濟動力同新早餐派按需要加強協作一早有迹可尋，消息更指早前財委會主席嘅內部協調，富貴黨殺出人緣麻麻嘅張宇人嚟鬥建制派呼聲較高嘅吳亮星，甚至有人流傳會不惜拉隊集體叛變支持白鴿黨劉慧卿，最後建制派接受咗吳、張輪流做主席嘅安排，經此一役，商界嘅問題只會有多冇少。