政壇:鄭承隆做新民黨副主席

立法會選舉結束之後,政壇異動頻密。早前我哋都講過仁濟醫院主席鄭承隆會加入新民黨,據講疑似擔當一條「大水喉」角色,射住新民黨發展。而新民黨前日舉行過中央委員會,通過由鄭承隆擔任該黨第二副主席,負責新界西事務。

鄭承隆尋日出席一個公開活動時都話,以後會花多啲時間喺地區做事,但從政與否就言之尚早喎。佢嘅仁濟醫院主席任期剩番半年,鄭承隆話到明,之後應該唔會加入其他機構,而且由今次立法會選舉所見,地區樁腳顯得非常重要,所以以後會集中處理新界西工作。

新民黨多個副主席,該黨立法會議員兼新民黨常務副主席田北辰就話,因為新界西對佢哋嚟講仲係個新區,需要開發人才同網絡,而鄭承隆係仁濟醫院高層,喺新界西人面一定廣,搵佢一齊處理新界西事務係最適合不過嘅人選。

第一手消息請下載on.cc東方互動iPhone/iPad/Android/Windows Phone Apps

鄭承隆正式加盟新民黨擔任副主席,主責新界西事務。