政壇：唐媽媽爆唐唐重掌家業
前政務司司長唐英年喺政壇淡出後，有傳唐唐受父親唐翔千之命，將重返家族企業半島針織廠。尋日到唐媽媽唐尤淑圻出席一個仁濟醫院嘅活動時就爆料，阿仔要返公司做嘢都唔係話返就返，事關要跟政府規定過一年再就業冷河期，而九月二十八日已經屆滿一年。咁講即係唐唐隨時可重掌祖業。
唐唐從政超過二十年，家族企業嘅董事總經理幾經替換，都係畀外姓人做。唐媽媽話，其實自己一路都有睇住盤生意㗎！咁如果日後唐唐又心痕、想重返政壇，唐媽媽又會唔會支持阿仔呢？唐媽媽若有所思話：「年紀大囉喎！」到底佢係話唐唐年紀大唔適合再從政吖？定係擔心自己年紀咁大都仲要再出山呢？
唐尤淑圻（右）支持簽帳行善，左為交通銀行香港分行副行政總裁陳霞芳。