SUN微博：打橫嚟講：跟強國人同機之空中見聞

一九七八年，偉大的中國藍圖設計師為加速強國改革開放，拋出一句：先讓部分人富起來。果真，一小撮精明得勢的特權分子，急速暴發起來，其向錢看的意識，由上而下，令村間野下的鄉紳土豪學懂有路可尋，短短數十載，激發中國人體內那股搵銀而無所不能的潛能，一下子，便超英趕美，成為全球經濟最強的第二大國，真唔小嘢！

呀！強國內遍地黃金，只要夠薑，隨手一撈，金糠滿屋啊！威震宇宙！

錢，係搵嚟使嘅！用咗先至係自己嘅！強國人民有的是錢，在國內揈極揈唔晒，當然要出外行吓，畀紅鬚綠眼的蠻夷見識吓強國人民的豪情壯氣嘛！

搭飛機屎急，梗係拉開道門「應急」吧！管乜叉逃生口，老子屎急大過天嘛！唔通要老子就地解決咁失禮江東父老咩！

早前，我從L.A搭長途機回港，鄰旁坐的兩位表叔，極品過極品，唔係用手機偷拍空姐，就係周之無時撳鐘仔，召空姐來聊兩句，臨起機還在講電話；飛機正降落時，佢哋就起身打開頭頂的行李艙，忙得空姐慌張撲來救駕。還有遠處兩件豐胸大嬸先是口角，繼而大打出手。好玩的，除我無知地伸頭看着她們外，其餘同胞卻沒人理會，我真係少見多怪鄉下仔囉！

強國農民富起來之後，世界多了姿采，天空上下再不一樣了！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府