政壇：搞搞政：陳岳鵬勤力熟讀《基本法》

做過特首辦特別助理及南區區議員嘅陳岳鵬（Ronald），喺新一屆政府中獲聘為政制及內地事務局局長政治助理，雖然上任冇耐，但佢已經感到新職位嘅壓力，呢幾日放假都密密捧住《基本法》讀，佢話唔單止多次由頭讀到尾，仲熟讀埋邊條條文甚至附件同特首選舉、立法會選舉有關嘅內容，咁勤力做功課，果然係官場有心人。

Ronald話，自己過往做嘅工作比較多同公關有關，所以上任新職位後為咗盡快上手，決定自發喺放假期間密密睇《基本法》外，又趁住十一期間好多酒會同聚會，同各界打吓關係。

佢出席呢類活動時仲有個「指定動作」，就係派發附有聯絡方法嘅新卡片畀一眾候任立法會議員，遇到政界人士，無論係新舊議員，佢都會抓緊機會，派片之後，又會摸定底、打算遲啲搵候任議員傾吓偈，連一向少出席酒會嘅一眾泛民主派議員，佢都唔放過，睇嚟，Ronald已經好投入新工。