政壇:白鴿民調被惡搞鬧爆

民主黨喺今屆立法會選舉輸剩六席,實力大減,連佢哋嘅年輕黨員都慨嘆白鴿已唔係泛民第一大黨,早前白鴿黨就搞咗個網上意見調查,了解吓市民對佢哋嘅意見,點知就疑似畀人惡搞,有一百份回收嘅問卷中,啲資料同答案都一樣,仲有問卷寫咗粗口添。睇嚟白鴿黨要搞清楚點解咁乞人憎,先可以自救。

白鴿黨早前做咗個網上問卷調查,就白鴿黨喺政改嘅立場、政改嘅結果,個黨係咪要改革等收集市民意見。但有乳鴿同我哋講,雖然收到二千幾份回覆,但「水分」多達四分一,仲問題多多,如粗口問卷、成百份一模一樣嘅問卷等,搞到佢哋都呻呢啲資料好難作分析同發布。

尋日白鴿黨搞咗個集思會,本想搵黨嘅新路,點知又得個吉,個會由朝開到晚,但係黨嘅路線、係咪要改革、領導人改選等咩都未傾,淨係講大家贊成要年輕化、多啲同市民溝通呢啲係人都知嘅嘢。佢哋要洗心革面,都唔知從何做起。

第一手消息請下載on.cc東方互動iPhone/iPad/Android/Windows Phone Apps