政壇：田二少吳克儉密斟國教
德育及國民教育科推行與否引嚟軒然大波，教育局局長吳克儉嘅表現亦惹嚟唔少批評，日前佢出席個酒會時，就同新民黨候任立法會議員田北辰密密斟，田二少事後透露兩個人講緊國民教育，不過，睇吓佢哋兩個傾偈嘅樣，田二少揸住酒杯講到眉飛色舞，吳局長全程就好似小學生咁聽多過講，唔通做過多份教育公職嘅田二少傳授經驗？
田二少接受我哋查詢時，坦承講緊國民教育，佢話雖然政府早前宣布學校有自主權決定是否開設德育及國民教育科，但近來唔少中產選民向佢反映，話如果政府單方面撤回指引，會令嗰啲諗住開科嘅學校唔知攞乜去教學生，又話個人認為教育局應該為呢啲學校制訂指引。田仲透露，吳克儉都覺得佢所言甚是，會返去考慮吓佢嘅意見。
田北辰（右）全程不斷指手畫腳，吳克儉（左）一直聽多過講。