政壇：立會復會張建宗勢捱箭

新一屆立法會下個禮拜就復會，財委會本月底將審議俗稱特惠生果金嘅二千二百元長者生活津貼，泛民主派同工聯會要求撤回資產審查，民建聯同自由黨就不約而同提出把資產限額提高，自由黨嘅核心人士更事先張揚唔會接受原封不動方案，要求「特惠生果金」資產限額「最好加啲」。

政務司司長林鄭月娥早前已不點名批評有人藉資產審查問題，阻礙政府推出「特惠生果金」，但唔少候任議員卻懶理，仍然同政府「開天索價」資產審查，以泛民主派為例，工黨正游說泛民議員投反對票，迫使政府撤銷資產審查，預計泛民二十七票會全數投下反對票。

建制派又係另一個戰場，工聯會嘅陳婉嫻早前提出「特惠生果金」嘅申請應與生果金睇齊，換言之七十歲以上長者毋須資產申報，工聯會六票睇怕都係凍過水；建仔卻提兩個優化建議，第一，六十五歲或以上長者申領生果金免資產審查，第二，特惠生果金資產限額要由十八萬六千元提高至三十萬元，點都好，勞工及福利局局長張建宗嚟緊肯定有一場硬仗要打。