政壇：大塞車王國強焗「忍」

中秋節碰上十一，中港兩地居民都迎來一個大假期，內地更在一連八日的假期前，首度宣布小型客車免費通行政策，點知一個本嚟係為大節日贈興嘅惠民措施，竟然搞到全國多個大城市嘅高速公路大塞車，唔少路段仲塞咗唔止一日添。廣東社團總會主席王國強中秋節上咗北京，就身受其害，四日假期幾乎日日同塞車搏鬥，最後一日去機場搭機返港，都要喺機場高速公路塞咗兩個鐘頭車，搞到人有三急都要忍完再忍！

車龍中動彈不得

王國強呢次上去都有好多重要事務，迎月前一日（九月二十九日）晚趕赴「國宴」時已經遇塞車，好彩佢提早幾個鐘出發，否則去到都散席。點知好戲在後頭，到佢返香港嗰日，首都機場公路又大塞車，佢由人民大會堂起程，車程本來只係半個鐘左右，當日卻凈係塞車都被困兩個鐘，如果佢唔係提早幾個鐘出門，真係飛機都搭唔切。

最慘嘅係人在車龍中，前後不得，佢講笑話，唔上京都唔知自己腎功能麻麻，原來當日塞車期間，人有三急但冇辦法解決，尷尬到極，但除咗練「忍功」之外都冇計喇。

今次內地宣布呢個節假日惠民措施，搞到全國各大道路大塞車外，更因為阻塞大量市民喺馬路上，最後搞到駕車者同屋企人被浪費時間，希望吸引人流嘅景點就比預期少人，連消費場所嘅表現都受影響，仲未計好多人好似王國強咁，幾乎連重要活動都大失預算嘅人。呢件事反映惠民措施如果冇諗清楚就推出，分分鐘變成累人累事！