老人悲涼過中秋 政治紛爭使人愁

年年歲歲月相似，今年中秋月更明。呢份意境唔使等今晚追月緬懷o架，有班人一早就體會到嘞。乜嘢人？咪就係通宵排隊買「四蚊飯」嘅公公婆婆囉！

披星戴月餐風飲露唔係為賞月，而係為飽肚，對孤苦無依、為勢所逼嘅老人家嚟講，呢個中秋何止皎月如霜，簡直滿心悲涼呀！所謂人月兩團圓，以前老人家度佳節，承歡膝下，桂香賞餅；今日老人家過中秋，擔櫈膝下，排隊買飯，都咪話唔唏噓。正如「東方報業民意調查」顯示，四成六受訪者指事件反映本港貧富懸殊日益嚴重；兩成一人認為老人生活無改善。

唉，古人中秋賦詩，明月幾時有，把酒問青天。今日老人家對月感嘆，平飯幾時有，把火問青天。老天爺，點解喺香港做老人咁淒涼嘅呢？點解貧困老人永遠都要含辛茹苦過日子嘅呢？香港自詡國際都會，居然有三十萬老人生活喺貧困邊緣，簡直係香港嘅恥辱！

唔好問老天爺嘞，問官老爺啦，尤其係曾蔭權爵士呀，問吓佢亂港七年點解對老人家咁刻薄！

嗱，上述民調顯示，三成六受訪者批評貪曾舊政府忽視扶貧，兩成八直斥老人政策徹底失敗；兩成批評前朝政府欠承擔。

好彩，月亮年年係嗰個，政府就有更替換屆，涼薄嘅舊政府收檔啦，總算畀到老人家少少希望。家陣嘅問題反而係香港愈來愈政治化，社會吵吵鬧鬧永無寧日，新政府施政唔癱瘓都偷笑啦，仲講乜為民謀福祉吖。

嗱，太一叮唔係杞人憂天o架。就講長者特惠生果金吖，當局建議每月發放二千二百蚊，但係已經有立法會議員揚言玩嘢，甚至可能拉布添。咁搞法，特惠生果金等民生政策隨時落實無期，搞到貧困老人下年中秋可能又要過住舉頭望明月，低頭思飯盒嘅苦日子！

民心如鏡，調查同時顯示，三成八受訪者唔希望民生成為政客鬥爭嘅犧牲品；三成七人希望新一屆立法會能合理討論，協助政府盡快推行政策。

老人悲涼過中秋，政治紛爭使人愁。無謂再內鬥喇，政客又好，政府又好，唔該做啲實事，等老人家可以過番個開開心心嘅中秋節仲好啦，叮！