政壇：政商定格：孫至誠歎台灣直送吞拿
標榜由遠洋漁場超低溫直送餐桌嘅順億鮪魚專賣店，自年初喺尖沙咀樂道開張以嚟，就吸引唔少鍾意食吞拿魚嘅食客去幫襯。淨睇個店名就估到同台灣有關，事關台灣將吞拿魚叫做鮪魚，難怪負責拓展台灣外貿市場嘅台北貿易中心主任孫至誠，新官上任未夠半個月，就約埋遠東貿易中心主任陳光丕去嘗鮮。
老闆Derek林錫偉同太太Lina親自招呼，佢哋係香港人，因睇好魚場直送嘅天然新鮮概念，所以同順億合作，將專賣店引入香港。Derek話順億擁有自家遠洋船隊，親赴大西洋、印度洋同北極洋捕撈，然後即時將魚肉保存喺零下六十度嘅超低溫環境，確保肉質新鮮衞生。
港人視Toro係刺身極品，其實Toro只係吞拿魚嘅前腹，成條魚仲有好多正嘢，包括極考工夫嘅烤吞拿魚下巴，仲有啖啖膠質嘅吞拿魚尾骨，包保一試難忘。
孫至誠（前右）同陳光丕（前左）大啖吞拿魚刺身，讚口不絕。後左起：為中港分店廚房把關嘅台灣師傅蘇殷新、老闆Derek同太太Lina。