政壇：小明送仔去澳洲有奇遇
「小明醫生」李家仁上禮拜趁住中秋節有幾日假期，送咗囝囝去澳洲墨爾本返學，由九月二十四號開始陪囝囝至九月三十號先返港。佢之前好似話過喺下一首新歌入面，小明會去澳洲睇袋鼠喎，唔知係咪順便去嗰邊攞靈感呢？而李醫生喺呢幾日有唔少奇遇，其中一件發生喺尋日。
佢話尋日朝早本來諗住趁囝囝學校未開學，買定啲家庭用品，所以就同囝囝去咗市中心，買咗個晾衫架、一張摺櫈，同埋一個有五個櫃桶嘅膠櫃。點知入完貨之後，外面落起傾盆大雨，而且仲因為當地即將舉行澳式足球Footy決賽，所以市中心封晒路，準備定做慶祝巡遊，搞到佢要同囝囝行好遠至有電車搭，拎住咁多嘢行咁遠，搞到雙手同雙腳都攰到軟晒。
呢件事真係盡顯李醫生廿四孝爸爸嘅本色，唔知呢個咁難忘嘅經歷，李醫生會唔會喺首新歌度提一提呢？