政壇：媽打籌獲近300萬行善
民政事務局前常秘「媽打」李麗娟退休後變身「籌款天后」，上禮拜五再次發功，為鄰舍輔導會舉行「愛．分享」慈善晚宴，幫助自閉症人士，「媽打效應」再次使得，一晚輕易籌得近三百萬元善款。籌款成績咁好，媽打興奮到又唱又跳，細妹李桂蘭都唱埋一份，引嚟哄堂掌聲。
晚宴上有位稀客，就係滙豐亞太區前主席鄭海泉。見佢好風騷，原來大女Simone凌晨四點幾誕下六磅重B女，仲係任職瑪麗醫院婦產科醫生嘅細女Hidy通宵幫手接生，鄭大班首次做公公，緊張到瞓唔着。鄭大班期望孫女乖乖讀書已足夠，長大後唔一定要做銀行大班喎！
媽打李麗娟（右一）同前高官施祖祥（左一）齊搞Ball，榮升公公嘅鄭海泉（右二）同社會福利署署長聶德權（左二）幾忙都嚟支持。