打擊僭建又縮沙 依法辦事淪空話

官僚靠得住，豬乸會上樹。嗱嗱嗱，又有例證喇。新界村屋僭建物申報計劃本來今日截止，當局早前至拍晒心口話唔會改變，點知日前又突然宣布將計劃延期三個月至年底，前言不對後語，五時花六時變，叫市民點信吖！

屋宇署署長區載佳仲死撐話，延期唔係屈服或反應差，而係村民最初唔了解計劃詳情，經過當局大力宣傳，近日申報反應踴躍，數字大幅飆升，署方已經收到超過七千三百份申報表嘞。佢仲打包單，話有決心解決新界僭建問題喎。

叮！有人估計，新界懷疑僭建村屋約有三萬五千間，港府當初大鑼大鼓推出申報計劃，但到截止日期只收到七千幾份，佔新界僭建物兩成多啲，咁仲唔係反應差？老實講啦，如果唔係反應差，當局又何須再延期吖。

話時話，延期三個月嘅效果未必好似當局想像咁樂觀，可能會有業主睇穿港府打擊僭建冇料到，一遇到反對聲音就縮沙褪軚，一於企硬唔報。試諗吓，如果三個月之後申報數字仲係唔理想，當局點算？係繼續延期，定係索性放棄？所以話，將計劃延期根本就係鴕鳥政策，唔只解決唔到問題，仲隨時弄巧反拙添。

古人講得啱，人無信不立，官無信不威。如果有法不依，違法不究，有法律等於無法律，政府就會失去公信力，到時無論做乜嘢都會受到質疑甚至阻撓，有效施政變成齋噏。

講開又講，僭建物遍地開花，新界係咁，市區亦係咁，呢啲完全係前朝政府施政無能、執法不嚴種下嘅惡果。新政府如果要撥亂反正，樹立管治威信，就一定要依法辦事，貫徹始終，絕對唔可以半途而廢。如果一有反對聲音就縮沙，等於自廢武功，到時退無可退，只會以失敗收場。

特首梁振英回應政府成日受到批評時話，為大眾做事總會有人鬧，只要認清方向，一步步做好實事，「行的是正道便好」。講就係咁講喇，但做唔做得到仲未知，計太一叮話齋，法律面前人人平等，對於僭建問題，絕大多數市民都希望政府有法必依，無論市區定係新界，無論高官權貴定係普羅市民，執法必須一視同仁，需要申報就申報，需要清拆就清拆，咁先至係正道吖嘛！