Sun奇古怪：Sun潮語：【CHOK樣】

潮語「CHOK樣」，意思係突然擠眉弄眼，控制面部肌肉，務求擠出一個平時不常見到嘅樣貌。至於「chok」個咩「樣」就要視乎需要。影相或追求異性就當然要「chok」個靚樣或型樣，畀人追還錢就要「chok」個窮樣，畀老細詐型就要「chok」個慘樣，對人就要「chok」個人樣，對鬼要「chok」鬼樣……總之無時無刻都要「chok」，好多人因此已「chok」到自己面目模糊，已經唔記得咗自己到底係點嘅樣……

「chok」呢個字係廣東話方言，本來意思係用手突然用力上下抽搐，例如開香檳前係要「chok」幾「chok」先會有泡噴出，又或者好似每次發射雷鳴燈鳥槍，上彈嗰下動作就叫做「chok」。總之拎住啲嘢上下上下郁吓郁吓，都可以叫做「chok」。

咁點解「chok」「chok」吓會「chok」咗個樣出嚟嘅呢？其實呢個潮語都係嚟自打機。喺90年代風行一時嘅經典格鬥遊戲「街頭霸王」，每個人物都有一招特別技能，出招時係要玩家用控制桿特別「chok」出嚟，當時「chok」呢啲招數出嚟，係要學習同反覆練習，初學者唔係下下都得。所以，成功「chok」得出係好開心。當時啲人日日去機舖日「chok」夜「chok」，久而久之，「chok」就開始變咗萬用動詞，及至後來連樣都可以「chok」。

今時今日，除咗「chok樣」之外，仲可以「chok feel」，「chok型」，「chok mood」……咩都可「chok」一餐，有啲明星更加係以「chok」聞名。真係到咗一個全民皆「chok」嘅時代。不過咁，「chok」始終都係有啲造作嘅意味，有啲假嘅感覺，有時仲會令人作嘔。好似近日有班建制議員上深圳扮晒幫手打擊走私客，然後返到香港「chok」晒樣，又喺度「chok」成功爭取……睇到唔只想作嘔，直情想死！