政壇：搞搞政：吳亮星組唔成班失籌碼

新一屆立法會嘅候任議員雖然仲未上任，但彼此埋堆、組班嘅動作就已七七八八，早前我哋都同大家講過，包括金融界候任議員吳亮星在內嘅中字派議員正拉攏議會冇黨派建制人士，如果成事，分分鐘可組成個擁五至六席嘅新陣營。件事似乎諗得美好，但落實唔易，最終組班不成，仲搞到吳亮星連爭立法會嘅重要職位都輸蝕咗。

講緊嘅係立法會財委會主席一職，依家嘅形勢係建制派有吳亮星同富貴黨飲食界議員「肥仔張」張宇人，鬥白鴿黨嘅劉慧卿，據聞有唔少建制派中人對肥仔張有意見，事關佢喺建制派內部人緣麻麻，同一眾建制派勞工界代表喺勞工或最低工資問題上又有牙齒印，而富貴黨嘅死敵經濟動力最後撐唔撐佢都好難講。比較起嚟，吳亮星嘅爭議就少啲。

喺議會拗手瓜，好多時係睇議席多少，所以據聞吳亮星同肥仔張最終化干戈為玉帛，兩人為咗唔想分散票源、最終畀劉慧卿趁虛而入，已經傾掂數，初步決定由肥仔張先做主席，兩人再梅花間竹輪任，由於會期只有四年，故兩人理論上可以各做兩年。