政壇：馮偉華啱時間病愈

新一屆立法會選舉結束大半個月，選舉提名截止前忽然傳出懷疑患前列腺癌嘅教協會長馮偉華，尋日高調出席一個活動，仲透露經過檢查發現，佢並唔係患癌，只係前列腺組織增生。身體無大礙，馮偉華全面恢復教務工作，教協嘅工作都會照做。佢呢次時間啱啱好嘅病倒、退選、再復出，成功避過立法會選舉，佢嘅蘇州屎就改由教協總幹事葉建源頂上，難怪尋日葉建源一聽，就話馮偉華直情屈咗佢入立法會啦！

樂見葉建源捱義氣當選

馮偉華尋日出席教協一個頒獎禮，兩個零月冇見，佢精神好好，心情都唔錯。問到佢身體，馮偉華話經過檢查後證實唔係患癌，不過，至今佢嘅監察指數都未降番低，仲要食藥同定期檢查，不過話晒一場病，佢依家都好怕凍，但已經可以做吓運動。

記得佢初初宣布身體不適，要放棄參選時，對教協嘅選舉部署同泛民嘅排陣都有一定影響，由於事情嚟得突然，仲有人質疑佢係咪有黑材料畀人揸住添。依家選舉過後，佢又忽然好番，人哋又點睇呢？佢話，唔理得啲人點講，對佢嚟講，退選係當時一定要做嘅決定，因為家人擔心、自己又驚身體應付唔到；至於黑材料之說，佢就話：「有嘅都一早畀人爆晒。」

講到代佢出征嘅葉建源當選，馮偉華話放下心頭大石，唔使驚自己嘅事累咗教協。不過，我哋問葉建源係咪好似畀人屈咗入立法會，佢就講笑咁話：「直情係啦，當時捱義氣，依家又唔可以畀番（議席）佢！」但拍檔身體冇事點都開心嘅。