貪曾鬼祟現身 廉署何時捉奸

太一叮今日想問大家兩個問題。第一個問題：仲記唔記得「天下第一貪」煲呔曾？

大家可能會話太一叮多此一問，貪曾貪腐成性，醜聞纏身，唔止搞到官場烏煙瘴氣，更加搞到香港嘅廉潔同法治招牌差啲拆埋，呢個英國爵士罪孽深重，市民點會唔記得佢吖？

其實，太一叮亦知道大家唔會忘記貪曾，咁問係有特別原因嘅。一來貪曾落台之後即刻鬼祟離港，行蹤詭秘，計起上嚟，大家都好耐冇見過佢嘞。二來咯喎，廉政公署查貪曾，查到家陣依然冇任何下文，相信好多市民都想問一問廉署，究竟你哋係放軟手腳吖，定係唔記得咗呀？

嗱，如果廉署記性唔好，等太一叮提醒你哋啦。早喺今年二月，東方報業集團獨家揭露貪曾連串貪腐醜行，轟動全城，而廉署亦喺同一個月正式立案調查。正如學者話齋，廉署已經查咗大半年，照計乜證據都搜集完啦，貪曾究竟有罪定冇罪，都係時候交代嘞啩。

消息就話嘞，廉署至今未會見貪曾，但絕對唔會就此罷休，而且已經將案件升級，交由一名助理處長全權負責，仲擴大調查層面，貪曾一家同牽涉在內嘅政商界名人一樣走唔甩，總之傳媒報道過嘅都會查咁話。嗱嗱嗱，如果消息屬實，唔該廉署快快做嘢啦，如果追查唔到貪曾行蹤，就多啲追蹤本報嘅獨家猛料，呢，本報啱啱直擊貪曾鬼祟現身香江，廉署仲唔拿拿臨請佢返去飲咖啡？

講到呢度，太一叮不禁要問第二個問題。俗語話，善有善報，惡有惡報，究竟係咪真嘅呢？東方報業盡好市民責任，當年挺身舉報「香港拉登」嘅罪行，結果唔止換來被人不斷滋擾同誹謗，更加換來法庭不公平裁決，簡直係善有惡報，是非顛倒。而貪曾貪腐醜惡，臭名昭著，反而傳佢可能做全國政協副主席，直頭係惡有善報，人妖不分，你話喇，呢個究竟係乜世界？

叮佢個鎯鎯，香港現時烏煙瘴氣，政治爭拗沒完沒了，風氣已經夠惡劣o架嘞，如果貪曾最後竟逍遙法外，甚至升上神枱，咁仲有天理嘅？到時唔止香港嘅廉潔同法治招牌不保，成個香港沉淪都似！

一句講晒，貪曾鬼祟現身，廉署何時捉奸。傳聞話，有關當局曾下達「三不禁令」，其中一條係禁止貪曾喺立法會選舉結束前踏足香江，依家立法會選舉早就結束，貪曾亦已蒲頭，廉署仲等乜嘢呢，叮！