政壇：政商定格：柯大俠請食飯親自搬酒
上市公司主席落手落腳搬酒，你見過未?思捷環球早前公布業績，同一晚董事會主席柯清輝（柯大俠）就喺跑馬地馬場訂咗兩圍枱，宴請公司一班外籍高層，副主席鄭明訓、新任行政總裁馬浩思（Jose Manuel Martinez）及即將卸任行政總裁嘅范德施都有出席，柯大俠主持大局之餘，仲做埋「阿四」，親手捧住一箱十支法國紅酒入廂房。柯大俠平易近人唔係奇事，但十幾磅重嘅紅酒都自己搬，認真唔話得。思捷早排有高層連環跳船，今次係外國高層們嚟香港，柯大俠宴請打氣都好應該。當晚宴客用嘅Louis Latour紅酒產自法國布根地唔算貴，但評酒家就有唔錯嘅評價。
柯清輝貴為主席搬成箱紅酒宴請公司高層，認真唔話得。