政壇：政商定格：大千智慧感動唐楚男蔡克昭
已故國畫大師張大千生前畫作「只送不賣」，大部分畫作都用作饋贈兒孫親屬、摯友和同業。而收藏多幅張大千名作嘅律師唐楚男同蔡克昭亦效法大師，只藏不賣。下月五至八日，佢哋會喺灣仔會展以「游藝堂」名義舉行「情義之交」張大千書畫展，將逾百書畫珍藏公諸同好。
講到大師曾言「吾畫之最佳者，只送不賣」，兩位律師都被深深感動，仲話張大千好有智慧，話說好多人都會攞番張大千嘅舊作去搵大師本人辨真偽，通常大師會先問對方畀咗錢未，如遇上被人臨摹嘅畫作，就會叫對方唔好買，買咗嘅話，大師就會喺畫作上面加多兩筆，變成真品。至於佢哋點解擁有咁多張大千真迹﹖原來全靠張大千好友沈葦窗雅讓畀佢哋，沈先生仲教佢哋挑選精品，其中一張只有賀卡咁大嘅「二童子圖」，無論畫功、構圖、意境都被喻為精品。
蔡克昭（左）和唐楚男（右）兩位律師除咗收藏書畫外，對粵曲京劇等藝術都有研究。
「二童子圖」畫中兩個小朋友據講係張大千友人之子。