政壇：搞搞政：阿Paul熱身頂做帳委主席

新一屆立法會下個月就宣誓就任，建制派及泛民主派正就大部分委員會正副主席人選展開協調，依家除咗財務委員會及保安事務委員會主席之位爆爭奪戰外，建制派內部亦憂慮政府帳目委員會同司法及法律事務委員會嘅主席暫定人選，唔排除物色之前未做過任何委員會正副主席嘅謝偉俊（Paul）頂上，阿Paul真可謂熱定身、坐定後備席都得喇。

我哋之前都講過，帳委會主席可能由地產及建造界石禮謙（大舊石）擔任，但有議員擔心佢嘅界別容易出現角色及利益衝突，據聞大舊石私底下向部分建制派議員表明只做一年，之後三年就唔理，而阿Paul就成為「替補」嘅第一人選。

至於司法及法律事務委員會主席一職，雖然有法律背景嘅梁美芬一早表明心迹想做主席，但佢都被指法律知識可能傾向學術，反而認為律師出身嘅阿Paul仲好啲，到時就會同泛民嘅法律界新丁議員郭榮鏗對撼，阿Paul尋日話自己性格唔鍾意同人爭，如果美芬堅持要做主席，佢亦唔會過分強求喎。