政壇：少年方潤華受孔孟教化
香港教育學院尋日舉行孔子像嘅揭幕儀式，呢尊高三點三米嘅孔子銅像，係由一向重視教育事業嘅協成行集團主席方潤華以其基金名義捐贈，呢尊係方潤華喺香港豎立嘅第二尊銅像，第一尊位於公開大學，令萬世師表嘅精神同思想喺校園薪火相傳。
方潤華喺揭幕儀式上大爆少年往事，話自細就好奀皮，讀書成績好差，爸爸都話佢無藥可救，安排佢入讀私塾兩年，學習孔孟之道，佢嘅人生亦由此重回正軌。方潤華話佢之所以咁熱心教育，係因為當年喺英皇書院讀中學期間遇上日軍侵華，冇辦法完成中學，更失去讀大學嘅機會，內心好痛苦，佢曾經同爸爸講，有朝一日賺到錢，一定會畀年輕人讀到大學，呢個心願佢亦一直身體力行。
方潤華（右）慷慨捐贈一尊孔子銅像予教育學院，署理校長鄭燕祥送上孔像剪影致謝。