政壇：陳啟宗話樓市冇咁易冧

近排新界東北發展計劃惹嚟唔少爭拗，恒隆地產董事長陳啟宗尋日出席活動時，講到呢個發展都話香港人應該自己決定：「又嫌地唔夠，起時又唔畀起，自己諗啦！」佢仲話本港樓市大升，完全唔係因為供應問題，而係息口低，啲人梗係買磚頭保值。

近期政府推地，但恒隆出手嘅次數又唔係好多喎，係咪顧住投資大陸，唔玩香港呀？陳啟宗話：「唔係，只係驚做嗰時（出手買地）大家唔開心，俗啲講句，（樓價）冧到阿媽都唔認得，你話開唔開心吖？」講緊係恒隆以往嘅「出手」記錄，又真係好似佢形容咁。至於家吓嘅香港樓市，佢話依家個市冇咁易冧喎，但係就冇再進一步解釋。

佢哋呢幾年都喺內地大城市搞商場，尋日喺瀋陽嘅第二個項目出世喇，陳啟宗讚不絕口，仲將旗下物業比喻為內地靚女明星范冰冰：「如果我係范冰冰，會擔心無男朋友咩？」即係唔憂商場冇人租啦！