政壇：胡志偉兼數職嗌救命

新一屆立法會選舉之後，白鴿黨大輸，議席大減兼老將出局，黨務工作又因為主席何俊仁請辭亂晒龍，政策工作惟有靠新丁胡志偉同黃碧雲等。依家佢哋一個人當四個使，而黃碧雲又據傳係主席嘅接任人選之一，所以新丁中，胡志偉嘅負擔估計會更重，仲要擔任埋幾個範疇嘅發言人。胡志偉尋日就嗌晒救命，話最近忙到搞唔掂，叫大家有咩事都對佢手下留情咁話。

白鴿舊人大減，鐵頭仁又因選舉而辭職，嚟緊翹手黨務工作，佢嘅蘇州屎需要搵人接。而白鴿本身嘅政策工作亦散散哋，事關該黨多個舊人出局，佢哋原本負責開嘅手尾全部都要人跟番，更何況立法會議員本來就分咗政策嚟做，譬如以前負責跟開房屋規劃政策嘅李永達、跟勞工福利政策嘅黃成智，同跟民政、環境政策嘅甘乃威，佢哋出咗局，但相關嘅工作都需有繼任人，胡志偉、單仲偕同黃碧雲三個新丁惟有頂硬上。

一人孭幾瓣

據白鴿黨宣布，黃碧雲嚟緊就會擔任該黨喺教育、環境同食物安全嘅發言人，而胡志偉亦會做民政、房屋、交通嘅發言人，兩人都要另外孭多三至四個政策範疇嘅副發言人職務，胡志偉仲話可能會執埋各黨友都冇咩興趣嘅文化事務嚟做。

我哋問胡志偉孭咁多嘢上身會唔會分身不暇，佢坦承最近的確係忙到爆，以致好多時候都覆唔切街坊同記者嘅電話。白鴿新丁主打嘅房屋、教育，都係現屆政府嘅燙手山芋，幾位新丁話唔定可以憑住對政府指指點點上位，但亦有可能禍從口出、講多錯多，呢次小兵大將兜亂上陣，掂唔掂好快就知。