庸醫害人斷錯症 整頓公院莫耽症

有人話，家陣入公立醫院睇病，就好似入木人巷咁，想有命走番出嚟，先要過五關。邊五關？斷錯症、配錯藥、輸錯血、打錯針、開錯刀，任何一關都足以令病人有入冇出！

當然啦，病人使唔使過足五關，關鍵睇第一關。一旦庸醫斷錯症，明明病情危急，命懸一線，佢哋都會話你身體健康，正常冇事，喺耽誤救治之下，其餘四關自然統統慳番啦，叮！

嗱，屯門醫院又發生懷疑庸醫斷錯症害死病人嘅悲劇。十二歲運動女將早前一日內兩度暈倒，被送入屯院，原來佢患有遺傳性「QT間期延長綜合症」而不自知，隨時都會因心臟衰竭而猝死。病人唔知自己心臟有事唔出奇，最離譜嘅係，連負責診症嘅醫生都懵到上心口，居然草草判斷女童患有「運動員心臟」，莫講話冇對症下藥，根本冇為病人作出任何治療，結果病人白白錯失救治機會，一個月後夢中猝死。好嘞，死因庭經過一輪聆訊後，尋日終於判決，話病人死於自然喎。

斷症要望聞問切，究竟死者係咪死於自然，大家不妨聽吓專家證人點講吖。專家話，死者嘅心臟超聲波根本冇顯示運動員心臟嘅徵狀，反而醫療紀錄就清楚反映死者心跳持續緩慢，有足夠資料確診係「QT間期延長綜合症」。事實擺在眼前，黃綠醫生斷錯症，咁就害咗一條人命！

叮你個鎯鎯，醫生嘅職責係醫人救人，庸醫為病人診症馬虎求其，咁同草菅人命有乜分別呀？連乜嘢病同基本病徵都唔知，已經夠離譜o架啦，仲要睇病得過且過，敷衍塞責，對病人問多兩句求證吓都慳番，咁搞法，公立醫院有乜可能唔變鬼門關呀？死者母親係咁講嘅，「屯門醫院斷錯症疏忽，令我冇咗個女，等同謀殺！」

冇錯，斷錯症早已變成公立醫院嘅死症，病人唔係枉死，就係被折磨到得番半條人命。醫管局話喎，會檢討呢次女童猝死事件，以及檢討連串醫療事故。

唉，依家先至檢討，遲唔遲啲吖。公立醫院變「攞命醫院」，醫療事故長爆長有，醫療醜聞無奇不有，當局早就應該落重藥根治啦。庸醫害人斷錯症，整頓醫院莫耽症，唔該當局快快根治公立醫院嘅頑疾，咪再害人害物嘞，叮！