政壇：搞搞政：怕長毛發難謝偉銓調位
當初建制派要編配會議廳座位時，可能諗住候任立法會建築、測量及都市規劃界議員Tony謝偉銓似位好好先生，接納激進嘅程度理應比其他人高，所以就好自然咁將佢編喺新民黨副主席田北辰同社民連「長毛」梁國雄之間，諗住以佢和善嘅性格可以平息所有干戈。
正當所有人以為佢願意犧牲小我坐喺長毛隔籬、忍受高聲喊口號時，根據秘書處尋日派發嘅議事廳座位表，原來佢已經靜靜雞咁同建仔曾鈺成調咗位，搬咗去會議廳嘅最右邊、即勞聯潘兆平隔籬個位，擺明係想避開長毛，費事長毛嘅不定期發難引致誤中副車就唔好啦！
