政壇：劉江華立會冇位入廚房？

做咗建仔主席五年嘅譚耀宗，原本諗住喺明年四月換屆正式交棒畀副主席劉江華，但可惜劉意外落選立法會超級區議會選舉，無緣坐上主席寶座，依家譚耀宗分分鐘短則做多兩年，耐則做多四年，想走都冇得走。

點解走唔到？首先建仔嘅領導層出現部分斷層，年屆六十歲嘅領導層同四十歲中生代之間，具有領導才能僅剩下劉江華一人，一批四十歲中生代仍要時間歷練同累積聲望，明年換屆選舉未必有足夠時間醞釀到接班人。

至於無緣做主席嘅劉江華，政圈盛傳佢有機會入「熱廚房」做政制及內地事務局副局長，但旋即有黨內兄弟表示有保留，底因係一來佢要辭去沙田區議員職務，觀感上實會惹來唔少流言蜚語，二來佢或有份推銷政改方案，無論點樣盡心盡力都會畀人扣上阻礙政制發展嘅帽子。於是有人隨即提出反建議，叫佢考慮其他副局職位，主因係「原罪」會較輕喎！