新沙士來勢洶洶 防疫症寧緊勿鬆

攞命攞命，認真攞命，沙士又嚟喇！

嗱，真係會攞命o架，呢隻俗稱「新沙士」嘅不明病毒喺中東爆發，害到兩死一危殆，全球拉響警號。得人驚嘅係，新病毒神出鬼沒，呢頭中東中招，嗰頭丹麥又發現多名疑似病人，如果真係不明病毒迅速擴散，容乜易好快就殺到香港o架，唔驚就假！

奪命病毒來勢洶洶，世衞總幹事陳馮富珍有嘢講，佢話新病毒會造成普通感冒，屬於溫和疾病，強調唔係沙士病毒。不過，佢又補充喎，由於資料有限，所以暫時難以評估咁話。

諗唔到新病毒詭秘難測，原來陳馮富珍講嘢仲高深莫測。既然資料有限，暫時難以評估，點解咁快就斷定新病毒係溫和疾病呢？新病毒可以迅速致人於死地，點解屬於溫和呢？

嗱嗱嗱，太一叮無意挑戰陳馮富珍，甚至希望佢講嘅嘢千真萬確，事關當年一場沙士肆虐全球，奪走八百條人命，實在冇人想悲劇重演。之不過咁，記得香港首次爆發禽流感時，時任衞生署署長嘅佢夠拍晒心口話自己日日食雞，叫市民唔使驚啦，結果疫情一發不可收拾，搞到全港雞毛鴨血。太一叮之所以舊事重提，唔係要針對陳太，而係想提醒港府，防疫寧緊勿鬆，有備無患，尤其當新病毒仲係防不勝防嘅時候，就更加要打醒精神，千祈唔好瞌眼瞓呀。萬一奪命病毒殺入香港，咁就死得人多o架嘞，叮！

港府係咁講嘅，由於穆斯林朝聖月來臨，香港往返中東人流增多，新病毒嘅傳入風險亦相應增加。為咗未雨綢繆，當局會將新病毒列為法定傳染病。

預防勝於治療，當局提高警覺性，總算糾正咗前朝政府防疫把關懶懶閒嘅壞習慣。不過仲未夠o架，如果只係提高警覺性，冇提高防範性，即係齋噏，一旦新病毒壓境，一樣會被打到一仆一碌o架咋。舉例講，醫學界話齋，冬季係流感高峰期，如果大吉利是真係撞正新疫症爆發，醫護人手足唔足夠應付呀？當局有冇制訂方案呀？

咁講啦，港產官僚出名防疫馬虎，沙士一役香港淪為重災區，白白犧牲二百九十九條寶貴生命就係血嘅教訓。面對新沙士，當局真係唔好再大覺瞓嘞！

稍稍值得欣慰嘅係，「每周一鑊」嘅周一嶽已經滾蛋，家陣嘅防疫掌舵人係食衞局局長高永文，希望新人可以勝舊人喇，叮！