政壇：搞搞政：得間屋無僭建陳岳鵬易申報

政府喺呢個月十二號委任五位副局長同政治助理嘅任命，但原來斬件上枱嘅唔單止係公布任命，連上任後嘅利益申報都係斬件出台。即係話，問責團隊嘅利益申報都係「成熟一項推一項」。

喺呢五位副局、政助中，目前只得政制及內地事務局政助Ronald陳岳鵬交咗申報表。點解佢嘅申報可以咁快「成熟」出台，埋位後一星期內就交到功課？佢笑笑口話冇乜家當需要申報，只係得一個自住單位，仲強調個單位冇僭建。咁即係話自己身家清白喇！

唔講唔知，原來Ronald係香港工商專聯會嘅董事，但佢話呢個組織好鬆散，只係幾個中央政策組兼職顧問喺○九年搞嘅一個討論社會議題嘅平台，仲話聯會由組成至今都冇搞過活動，只係有其他成員不時用個人名義寫下文咁。而佢喺接到政助一職後亦即刻辭去董事一職，之不過申報嘅時候有關辭任程序仲未做晒喎，為咗保險啲所以當日咪照申報住先囉！