政壇：方黃吉雯日行萬步夠恒心
健康快車尋日舉行記者會，宣布同清水灣鄉村俱樂部聯合主辦一項慈善跑，健康快車創會主席兼籌委會主席「小吉」方黃吉雯、清水灣鄉村俱樂部副主席王桂壎、健康快車基金理事會副會長黃帆風，仲有十六項世界體操冠軍兼○八年奧運金牌得主李小鵬一齊出席。體態健美嘅小吉會參加五公里慈善步行，佢話因為關節磨損，連上落樓梯都要小心，所以唔敢參加十公里慈善跑。
每日都帶計步器喺身嘅小吉，堅持每日步行一萬步，如果行唔夠就返健身室行埋佢，真係好有恒心。
已退役嘅李小鵬，依家有自己嘅生意，為跳水隊同體操隊嘅成員謀出路，搵廣告代言，小鵬話做生意最難就係要搵生意，最希望賺到錢，至於依家邊個最高身價，佢就笑笑口話：「你話呢？」
方黃吉雯（左起）、李小鵬、王桂壎齊運動支持「健康快車」。