政壇：林鄭落區順手買月餅
被冠以「好打得」嘅政務司司長林鄭月娥前日結束訪問北京行程返港，尋日就落區去元朗。佢先同班區議員會面，討論天水圍墟市、對外交通配套等議題後，就靜靜雞去咗該區有名嘅大同老餅家，當時大同第二代傳人謝禎原同第三代傳人謝興之都喺度，見到貴客到臨，都覺得好驚喜。
林鄭走入店內，買咗豆沙雙黃月同五仁金腿月各一盒，都係好傳統嘅月餅，又買咗大量豬籠仔餅送畀小朋友。臨走前佢同餅店謝老闆講，話自己好鍾意傳統嘢，叫佢哋畀心機做落去喎！即係幫老闆打打氣啦！
呢間餅店係元朗區最耐歷史嘅餅店，已創立逾六十年，以月餅、唐餅最受歡迎，當中唔少人都鍾情佢嘅五仁金腿月，不油不膩、甘香可口，林鄭真係識食。
林鄭月娥（右）買月餅，仲向店主謝禎原（中）同謝興之了解銷售情況。