政壇：CY話港人怕老婆唔怕政府

特首CY梁振英政府上任近三個月，外間不時對政府提出嘅政策質疑責難，CY為印證港人不怕政府，不惜引用有人曾講過「怕老婆，不怕政府」嘅金句做例子。CY作為香港嘅第一把手，希望團結各界齊心信任政府，認真奇招盡出。

CY尋日出席一個論壇時話，回歸前曾有立法局議員，提出香港呢個地方嘅自由，可用「怕老婆，也不必怕政府」來說明，事實證明香港回歸後自由度冇變，因為只要問問今日在座嘅香港男士，都可以向外地朋友說明，港人繼續係「怕老婆，不怕政府」。

佢又提及政府經常畀香港市民同企業告到法庭去，「打了不少，輸了不少」，也說明「不怕政府」，而且司法機關完全獨立喎。

另外，CY尋日出席論壇前有小插曲，話說負責呢次論壇嘅主辦單位，原本安排咗半個小時，畀台灣記者向CY提問，點知有台灣記者話「貨不對辦」，最後只有交換卡片同合照環節，感覺畀人呃咗喎！特首辦回應話，CY公務繁忙，未能接受提問，已書面回覆台灣記者嘅提問。