政壇：陳維安兩招響頭炮

立法會喺下個月十號召開首次會議，到時七十位議員將進行宣誓儀式，之後就會即場進行主席選舉。雖然人民力量、社民連同工黨部分成員揚言會唔跟規矩讀誓詞，但為令新丁喺宣誓時唔會甩甩漏漏，秘書處今日會有專人示範點樣走位同讀誓詞。

申報「雞精班」出席率低

喺中環舊立法會年代，議員讀誓詞時會對住秘書長吳文華面向主席位，但今年喺新大樓就會背向主席位、望住所有議員進行。宣誓議員嘅左右兩邊分別係助理秘書長梁慶儀同候任秘書長陳維安。陳維安話咁嘅安排除令議員面對公眾立下神聖承諾之餘，又可以等傳媒攞到最靚嘅拍攝角度，可謂一舉兩得喎！

此外，當前四屆立法會議員讀誓詞宣誓緊嘅時候，其他五十九位議員要陪埋一齊「罰企」，但呢個情景應該會成為絕響。事關有部分議員向陳維安要求免除「罰企」慣例，喺未輪到佢哋行上主席位前宣誓時可以舒舒服服坐喺度慢慢等。話時話，宣誓儀式歷時近兩粒鐘，班議員企足咁耐真係腳仔軟o架，陳維安之後喺絕大多數議員贊成下廢除原有做法。佢上任就從善如流，推出兩項嘅新安排，都算做咗第一場好戲。

另外，立法會秘書處尋日為候任新丁議員舉辦俗稱「雞精班」嘅工作坊，教佢哋點樣申報個人利益，但全日出席嘅新丁得十七位，佔三十五個首次入立會大家庭加翻叮議員總數唔夠一半。更奇怪嘅係，出席嘅議員普遍唔算太富有，唔通嗰班富貴議員早已知道晒成個申報程序？