SUN世代：行雲流水商場百勝

半杯水，有人擔心只得半杯水，有人卻感恩還有半杯水。一杯水，在紡織製衣集團管理達人楊華勇（Johnny）眼中，除視為賺得下一杯水的機遇外，更從水的特性，悟出人際學。他認為，人總要力求多變，在實務上講求互相合作，不可一言堂，更以「水力學」游走商界關係點線面，即使人事複雜交錯，只要理順關係，便可行事無阻。

今年雙春兼閏月，Johnny喜事接踵而至，先是三月小登科，繼而四月成為香港菁英會主席，愛情人氣雙贏，靠的不是運氣，而是一套「水」哲理。他娓娓道來說：「水有唔同形態，人都要一樣，唔可以一套到尾。因為你再叻，始終都唔可以做晒所有嘢，要同人合作，合作就唔可以硬要別人跟你嗰套。」

有感而發，皆因Johnny的父親雖以紡織製衣起家，後來生意涉足地產等多範疇，覓得不同機構合作，更將每項業務分拆成多間公司管理。Johnny一早以打理家族業務為己任，二十多歲於澳洲修畢工商管理碩士，便回港加入公司集團，每日更與數十間聯營公司聯繫打交道。

要同時兼顧多間公司，他以水作比喻，要像水般可以化身成天上的白雲，洞察全局。他憶述，曾推行集團電子化，將不同公司工序以同一套系統處理，以提升管理。「當時有唔少員工反對，有人仲直接同我爸爸投訴，但係有時所謂最好嘅方法，只係習慣咗個模式，未必等於最好。」

為免一言堂，當時他建議先試行一個月，視乎效果再作決定。結果大部分員工操作一段時間，適應了新模式後，即體會到新系統的好處，樂意執行，「特別是訂貨量大、批次多嘅公司，用電腦跟單就方便好多。」不過，對於部分走高檔路線，講求靈活運作的公司，Johnny亦會從善如流，准許不需使用新系統，「最重要有商有量，睇吓有無道理。」

相處之道，說穿了，都是將心比己。他說：「衝突好多時源於大家唔了解對方嘅處境。好似趕貨期，員工想盡力完成責任，好想趕上貨期，喺佢哋角度無錯，但原來要趕得起會多一百元成本，趕唔切只係扣十元，計算得失後，老闆梗係話唔趕啦。員工唔了解，就會唔同意。如果理解大家處境，就唔會有衝突，同朋友相處就更加係咁。」

即使遇上頑固員工，存心鬥氣，他亦希望以理服人：「千祈唔好同佢一般見識，唔使嬲！」要保持心境開朗，想法子以柔制剛，自然就事事順風順水。

Johnny's小檔案

現職：香江國際集團執行董事

公職：香港菁英會主席

學歷：澳洲達爾文大學工商管理碩士