政壇：搞搞政：政府如桑拿張炳熱到瘦

新政府已運作快將三個月，政圈一直形容新政府十足熱廚房，而棄醫從官嘅食物及衞生局局長高永文更坦言，呢個熱廚房比想像中更熱，已升到四十幾度高溫。不過，高醫生呢個「想像」尋日已被運輸及房屋局局長張炳良嘅深刻體會所超越嘞！

張炳尋日出席一公開活動時坦言，政府唔單止係熱廚房，直頭係桑拿房，自己入咗去幾個月，足足瘦咗成個圈。佢話因為係公眾人物，又成日要喺外面食飯應酬，所以好緊張自己嘅體重，每朝起身都會上吓磅，睇吓有冇重到。自從佢做咗局長之後，幾個月來最多瘦咗八磅，直到近期先叫做見底回升，肥番兩磅咁大把。

雖然政府呢個桑拿房熱得驚人，但張炳話冇有怕，而且佢唔單止要搞好本港嘅房屋問題，運輸方面都會積極處理。佢仲話未來幾年會優化本地鐵路同巴士路線，因為好多人都希望有多啲鐵路，但同時又要考慮增建鐵路會唔會影響其他交通工具，以及引發其他環境問題，所以真係好多嘢要諗。