政壇：許曉暉送禮撐社企月餅
仲有幾日就係中秋節，民政事務局副局長Florence許曉暉近日送月餅，但就鎖定社會企業嘅產品，今年佢支持社聯「好好社企」出品嘅「花好月圓月餅」禮盒，繼續以言傳身教支持社企發展。
「花好月圓月餅」禮盒由精神病康復者及殘障人士製作，入面有四件「低糖雙黃白蓮蓉月餅」，每件都以傳統倒模工藝壓印手工字體「好」字，寓意花好月圓。禮盒嘅設計亦瑰麗搶眼，直身禮盒外層係傳統手撕紙藝中秋圖案，認真好心思。
其實Florence今年農曆新年，就揀咗社企iBakery愛烘焙麵包工房出品嘅曲奇做賀禮，唔講仲以為佢係社企代言人呀！
