政壇：鍾少權派雪糕冧同事
近排秋天嘅味道愈嚟愈濃郁，但係下午好多時仲係熱辣辣，有得食吓雪糕就最好。星展香港零售銀行董事總經理兼豐盛理財及分行網絡業務主管Derek鍾少權就度咗條橋，突然「落區」送雪糕冧同事。
Derek特登租咗部雪糕車，扮成流動雪糕車隊，一日之內走勻港九新界所有分行，整雪糕畀九百個同事食，連佢都落手落腳整軟雪糕，十足雪糕佬上身，真係整到手軟。
除咗送雪糕之外，佢仲另外訂咗一批粉紅色心形蛋糕，用嚟多謝前線班同事，啲同事仲以為過緊情人節，收到honey嘅甜蜜蛋糕。Derek話成個活動唔單止係感謝同事，仲要向佢哋推廣吓，對外嘅客戶服務質素應該要點做至好。
Derek親自帶隊，送雪糕畀前線員工。