政壇：曾蔭培一提貪曾即黑面

「貪曾」曾蔭權喺七一後已消失咗一段日子，我哋之前寫過，有關方面為免佢繼續攪風攪雨，禍害香港，早前勒令佢喺九月九日立法會選舉投票前都不得回港，結果佢真係連票都好似唔敢投。之後不時都有傳貪曾已獲「解禁」返港，但除咗啲未必可信嘅貪曾遺臣同親信外，冇人能夠證實佢依家真係喺香港，住喺邊度更加係一個謎。佢細佬曾蔭培尋日被問及貪曾行蹤時，就話呢啲係私人問題，拒絕作答，到底點解要咁神秘鬼祟呢？

新創建尋日召開業績記者會，執行董事曾蔭培亦有出席，本報記者一向佢提起「曾蔭權」三隻字，一直笑容滿面嘅曾蔭培立即面色一沉，在場公關亦大為緊張。記者最後喺有限時間下，一口氣問佢點睇大佬嘅連串醜聞？對佢係咪仲有信心？大佬出席「江湖派對」係咪同江湖人士過從甚密？以及貪曾依家究竟身在何方？但曾蔭培最後只係答咗一句：「私人問題，我唔答。」