政壇：建制派做立會人牆

新一屆立法會會期下月召開，班議員繼之前出盡法寶爭奪議員辦公室後，佢哋尋日又為會議廳座位爭餐飽。經過一輪抽籤後，會議廳座位表終於塵埃落定，建制派議員繼續坐喺官員席附近區域「保皇」，而泛民主派就繼續被編去會議廳嘅另一邊。據了解，建制派座位之所以有咁嘅安排，其實係想築起人牆防止激進派議員掟嘢。

KK「危坐」 前排

雖然人民力量同社民連四位成員繼續毫無懸念被隔離喺會議廳最後位置，右手邊仲有成排空櫈等佢哋可以大放示威物品，但佢哋嘅左手邊竟然有幾個建制派成員，到底係邊幾位議員肯犧牲小我坐喺佢哋隔籬呢？

根據建制派暫時協調成果，建築、測量及都市規劃界謝偉銓同體育、演藝及文化出版界馬逢國，會分別以一前一後方式坐喺人民力量成員隔籬，而新民主同盟范國威就會坐喺社民連梁國雄右手邊。民協KK馮檢基同衞生服務界李國麟就無奈坐喺拉布四人組前面。馮檢基話坐喺前面有少少危險，但鬼叫自己係一人黨冇得優先揀位咩！

張超雄被「迫遷」

內會座位表尋日亦出爐，火花位係拉布四人組坐正喺新民黨主席葉劉淑儀、副主席田北辰同謝偉俊後面。謝偉俊話以後嘈就會嘈啲，但好彩內會開會時間唔長，唔使成日對住四人組喎。

另外，工黨張超雄投訴被秘書處迫遷，要佢搬去十樓同人民力量做鄰居，冇得同原先喺九樓嘅工黨成員一齊，而佢原先想要嘅房就畀咗教協葉建源。張超雄話冇得同工黨同一層工作梗係有啲唔方便啦，所以尋日已向秘書處反映，依家就要睇下教協葉建源肯唔肯成人之美喇！