長者辛酸等人救　政治紛爭何時休

咦，有人捱飢抵餓蜂擁排隊喎，有人捱更抵夜通宵輪候喎，搞到逼爆玻璃咁款，唔通又嚟爭買新潮手機？爭就係爭嘞，不過唔係爭電話，而係爭飯盒。

係咁嘅，連鎖快餐店推出「四蚊飯」優惠，每間分店名額二百個，吸引咗大批市民喺店外苦苦等候。排隊爭飯食唔誇張，最誇張嘅係，人龍蛇餅絕大部分係老人家，有人凌晨四點開始擔櫈仔霸頭位，有人長途跋涉由北角走去石硤尾排隊，為嘅只係想買到一個平價飯盒果腹。捱咗一個上晝，公公婆婆終於買到一盒四蚊飯，嗰份興奮呀，仲犀利過後生仔買到個iPhone 5呀！

唉，睇見輪平價飯嘅老人絡繹不絕，真係唔知可喜定可悲。本來呢，老友記仲有力同班後生爭一日之飯盒，應該係值得欣慰嘅，之但係香港老人生活艱苦，風燭殘年仲要為口奔馳，教人情何以堪！

咁講啦，排隊嘅公公婆婆唔排除有人貪得意、貪便宜，但更多應該係生活所迫，所以先至嚟混口飯食嘅啫。講句唔好聽，老人家眼矇耳聾行動不便，如果唔係生活所迫，都唔會手騰腳震咁山長水遠嚟排飯盒啦，你估真係貪過癮咩？

所以話，香港人排通宵搶購潮流電話，好似食飽無憂米，其實只係社會其中一面。另一面見到嘅，就係老人家通宵輪購平價飯盒，原因係生活捉襟見肘，所以慳得一蚊得一蚊。

叮你個鎯鎯，都係前朝政府無能害人，一則搞到貧富懸殊不斷惡化，二則搞到安老政策唔湯唔水，所以貧困老人無依無靠晚景淒涼。有人要執紙皮幫補生計，有人靠微薄生果金度日，有人排平價飯盒餬口，最激氣嘅係，過氣特首曾蔭權居然一度要為老人生果金設立審查門檻，當生果金係嗟來之食，幾忤逆呀！

老人唔止要一個廉價飯盒，更加想要一個卑微願望，就係為香港貢獻大半生之後，晚年可以過得有尊嚴。要做到呢一點，港產官僚固然要洗心革面，唔可以再做忤逆子孫啦。其他政客咯喎，亦要放下政治鬥爭，唔好阻撓新政府施政至得。試諗吓香港家陣乜都政治化，吵吵鬧鬧，內耗內鬥，政府架構重組又反，國民教育又反，連發展新界東北拓土建屋都話要反，咁搞法，政府就算想做實事都做唔到啦！

長者辛酸等人救，政治紛爭何時休？唔好再鬥啦，大家快快同心合力幫吓班老人家仲好啦，叮！