政壇：政商定格：宗慶后再膺胡潤榜首富
成日話股票市場瞬息萬變，但原來各位富豪嘅身家都會大上大落。啱啱就睇完最新公布嘅「2012胡潤百富榜」，娃哈哈集團宗慶后同佢嘅家族繼一○年後再次登上榜首，成為第三位能夠兩次登上中國首富寶座嘅企業家，認真難得。
據統計，宗慶后家族嘅身家有成八百億元人民幣，比往年足足多咗一百二十億元人民幣！不過有人歡喜有人愁，上年位列榜首嘅三一重工梁穩根，今年就因為旗下兩間公司股價下跌，搞到身家「大縮水」跌咗三成四，由第一跌落第五位。而今年嘅平均財富係五十四億元人民幣，雖然按年下跌百分之八點五，但比起十年前就增加咗十倍。
值得一提嘅係，打入十大富豪榜有兩位新人，分別係排名第七、騰訊主席馬化騰同排名第十嘅陳麗華，而十大富豪中，來自房地產行業最多，有五位，以飲料、IT為主業嘅有兩位。
娃哈哈集團宗慶后同佢嘅家族繼一○年後再次登上「胡潤百富榜」榜首。（資料圖片）