政壇：搞搞政：IT隊成形設科技局有望

政府架構重組方案擱置，令有資訊科技界人士對遲遲未成立科技及通訊局（科技局）感到失望。不過唔使擔心，事關新一屆立法會原來有五個IT背景嘅議員，絕對有實力組成「IT小隊」，如果五人聯手為IT界爭取權益，呢股新勢力真係不容小覷！

五個IT人嚟自建制派同泛民，包括「正印」嘅資訊科技界功能界別代表莫乃光、白鴿黨單仲偕、建仔嘅葛珮帆、本身做IT嘅工程界盧偉國，至於第五個就係當選香港島議員嘅建仔鍾樹根。原來樹根以前都係IT人，雖則連佢都話自己嘅IT知識有啲過時，但點都做過建仔嘅資訊科技及廣播事務副發言人。

雖然兩大陣營政見有異，但相信「IT小隊」講到業界議題時，分歧大極有限，特別係催促政府加快成立科技局。我哋日前已率先報道，成立科技局嘅爭議較少，據聞政府會率先將有關建議提交立會諮詢，而盛傳會出任首任局長嘅楊偉雄，各黨派同業界對佢反應亦尚算正面。