政壇：沈祖堯為交流生打氣
香港中文大學同亞洲、澳洲、美洲約三十個國家及地區嘅二百二十多所高等院校合辦學生交換計劃，預計今年到中大嘅海外交流生及外出交流嘅中大生有千多人，呢班世界嘅精英學生日前就雲集中大，場面墟冚。向來贊成中外學生多交流嘅中大校長沈祖堯，就親自到場為呢班海外精英學生打氣，齊齊豎起拇指讚好，感覺好似一家人咁。
中大今年共取錄咗近五百個海外本科新生，好多都係成績優異嘅精英，佢哋以各種國際或當地認可嘅考試成績報考中大，其中兩名台灣學生更加喺當地嘅學測考試中，取得滿分成績。另有一名來自南非嘅學生，自稱正在學習功夫，所以希望對中國文化有更多認識。另一名來自馬來西亞、精通兩文三語嘅吳同學，就被中大工程學院提供嘅在學實習計劃吸引，希望藉此吸取工作經驗，畢業後留港工作。
沈祖堯（箭嘴示）親為數百名入讀中大嘅海外交流精英學生打氣。（中大提供）