政壇：老巢失守KK歡宴唔知醜
民協今次立法會選舉冒住滅黨風險，派出KK馮檢基參選超級區議會，雖然最終贏到，但就犧牲咗九龍西老巢，真係前路茫茫。但KK似乎仲未感覺到危機感，當白鴿黨大敗後開檢討會之時，民協呢個一人黨反而搞咗個助選團聯歡會。乜嘢叫自我感覺良好？咪係呢啲囉！
講番個聯歡會，雖然慰勞義工係好重要，但睇張相就可以發現，成班民協中人得KK笑得最開心，部分人更加係強顏歡笑。近期同民協出雙入對嘅南區區議員司馬文都有現身，仲發表講話。睇怕佢成為民協第一洋人，都唔係冇可能喇。
不過，就算司馬文入黨，民協都要面對好多問題，但偏偏KK就唔多覺，仲不停話自己有成二十幾萬票，支持者較上屆選舉多出六倍喎，睇嚟佢仲未知道，好多選民係含淚投民協嘅，究竟有幾多係真心真意支持佢呢？