政壇：嫻姐鎅票仇未消

其實喺立法會選舉過後，所有新仇舊恨理應放低，但仇恨呢家嘢，唔係話放低就放低。好似當選超級區議會嘅工聯會陳婉嫻咁，聲稱喺選舉中慘遭建仔𠝹票，有傳佢未能夠成為全港票后嬲到震，要即刻離港散心。經過差唔多兩個星期時間，嫻姐尋日終於現身，透露過去八日去咗日本一個「樹木好多」嘅地方休息散心，但尋日見嫻姐仲未係最佳狀態，有兩聲咳之餘仲少少痰上頸，似乎仲未抖順條氣喎！

出席節目無交流

嫻姐話選舉前都冇乜事，但一選完，壓住喺氣管入面嘅嘢都走晒出嚟，搞到上、下呼吸道都有感染。不過，究竟係乜嘢壓住咗條氣管？嫻姐就冇透露喇，似乎唔係細菌感染咁簡單喎，唔通係畀人𠝹票嗰啖鬱氣仲頂住？咁啱嫻姐尋日同做咗超級區議會票后嘅建仔Starry李慧琼一齊出席電台節目，雖然兩人排排坐，但全程無乜交流，就連招呼都冇打，似乎大家玩緊「我睇你唔到」咁款。

其中一幕最精彩嘅情節，係主持人質疑Starry作為行政會議成員，點樣可以睇住樓價不斷上升時，Starry都唔知點樣反駁。咁啱得咁蹺，嫻姐事後就話，做行會成員應該主動畀意見，如果一味聽意見就唔使入行會啦！嫻姐講緊邊個？唔使畫公仔畫出腸喇！

雖然Starry孭住行會個身份，但佢話一樣可以擔任一啲事務委員會主席職務，佢嘅心水包括教育事務委員會。