認知障礙已正名 養老支援仍癡呆

港產官僚蝦老人記性差，成日話會對老人癡呆症病人加強支援，但次次講過當冇件事。病人左等右等，橫等豎等，等到連老人癡呆症個名都變埋兩次嘞，仲係見到當局喺度口噏噏，真係心血少啲都畀佢哋激死！

「香港老年痴呆症協會」正式改名為「香港認知障礙症協會」，認為新名更能反映患者失去方向感、執行力下降同記憶力變差等等徵狀，而且字面性質較為中立，希望可以減低歧視。唔知大家仲記唔記得呢，其實醫管局兩年前已經將老人癡呆症易名為腦退化症，所以主席胡定旭就話嘞，對再正名持開放態度，會同醫學界商討喎。

其實計太一叮話齋，老人癡呆症又好，腦退化症又好，認知障礙症亦好，叫乜嘢名都冇所謂，最緊要係患者能夠得到最適切嘅療養，病人家屬可以得到最恰當嘅支援。但係咯喎，當局對呢方面好明顯有認知障礙，所以搞到病無所醫又老無所靠，患者家屬叫天不應、叫地不聞。

嗱，協會係咁講嘅，現時輪候公營專科治療需時約一年，如果政府能夠增加醫護培訓，就可以有助病人及早確診，把握治療黃金期。嗱嗱嗱，如果港產官僚嘅腦功能無退化嘅話，應該聽得出弦外之音。如果真係聽唔明咯喎，就等太一叮講你哋聽啦，就係當局嘅支援工作遲緩癡呆，令老人家錯過診治黃金時機呀！

叮你個鎯鎯，睇嚟港產官僚嘅認知能力真係有啲問題，等太一叮再提醒你哋一件事啦。香港正面臨人口老化危機，現時認知障礙症患者嘅十萬人之數隨時再創高峰，當局再係闊佬懶理，問題只會愈嚟愈大，最終害人害己o架咋！

唉，認知障礙已正名，養老支援仍癡呆。喺遲鈍官僚嘅管治之下，認知障礙症病人已經無專科安老中心入住療養，家陣仲要面臨耽誤病情嘅擔憂，唔病就假！

講到呢度，大家有冇發現呀？港產官僚好似有齊晒認知障礙症嘅病徵喎。嗱，支援政策雜亂無章，明顯係失去方向感；加強支援踢極唔做，就係執行力下降；講過盡力幫助病人當冇件事，仲唔係記憶力變差？

胡定旭呀胡定旭，保你大千祈唔好有認知障礙症呀，你續任主席時講過會增聘醫護人手，縮短病人輪候時間，千祈唔好轉個頭就忘記得一乾二淨呀，萬一激到班公公婆婆要上街遊行叫你落台，好辛苦o架，叮！